“𝗛𝗶𝘆𝗮𝘀 𝗻𝗴 𝗕𝘂𝗸𝗮𝘀”

Sa bawat titik na umaalpas,

May hiblang nag-uugnay sa puso’t bukas;

Sa bawat pintig ng pantig ng pusong nagmamahal sa bayan,

Muling sumisiklab ang pagkakakilanlan sa kinagisnan.

Mga tinig ng ninuno’y sa agos mo’y dumadaloy,

Sa bawat pagbigkas ng baya’y pakiwari ay inuugoy.

Mga salitang inukit ng kasaysayan,

Kaakibat ang bayang naghuhumiyaw para sa kalayaan.

Sa iyong mga salita’y may luha at ligaya,

May sugat ng digmaan at awit ng pag-asa.

Sumisimbolo sa diwa ng bayan ni Juan,

Ugat na kailanman ay hindi malilimutan.

Ating ginagalawan man ay paulit-ulit na magbago,

At ibang tinig ang manaig sa mundo,

Nawa’y ikaw pa rin ang manatiling tanglaw at ilaw,

Wikang Filipino, aming gabay at aninaw